ഒരിടവേളയ്ക്കുശേഷമുള്ള ഐപിഎല്‍ തിരിച്ചുവരവ് എം.എസ്.ധോണിയുടെ ചെന്നൈ സൂപ്പര്‍ കിംഗ്സ് ആഘോഷമാക്കി. അവസാന ഓവറിലേക്കു നീണ്ട മത്സരത്തില്‍ മുബൈ ഇന്ത്യന്‍സിനെ ഒരു വിക്കറ്റിനു പരാജയപ്പെടുത്തിയാണ് ചെന്നൈ പതിനൊന്നാം എഡിഷനിലെ ആദ്യ വിജയം സ്വന്തം പേരില്‍ എഴുതിയത്. 118/8 എന്ന നിലയില്‍ പരാജയം മുന്നില്‍ക്കണ്ട ചെന്നൈയെ ഡ്വെയ്ന്‍ ബ്രാവോയുടെ തകര്‍പ്പന്‍ ഇന്നിംഗ്സ് രക്ഷപ്പെടുത്തുകയായിരുന്നു. 30 പന്ത് നേരിട്ട ബ്രാവോ 68 റണ്‍സ് നേടി. മൂന്നു ബൗണ്ടറികളും ഏഴു സിക്സറുകളും ബ്രാവോയുടെ ബാറ്റില്‍നിന്നു പിറന്നു. 18-ാം ഓവറിന്റെ അവസാന പന്തില്‍ ബ്രാവോ പുറത്തായെങ്കിലും അവസാന ഓവറില്‍ ജയിക്കാന്‍ ആവശ്യമായിരുന്ന ഏഴു റണ്‍സ് കേദാര്‍ യാദവിന്റെ ബാറ്റില്‍നിന്നു പിറന്നു. യാദവ് 22 പന്തില്‍നിന്ന് 24 റണ്‍സുമായി പുറത്താകാതെനിന്നു. മറ്റാര്‍ക്കും ചെന്നൈ നിരയില്‍ മികച്ച പ്രകടനത്തിനു കഴിഞ്ഞില്ല. മുംബൈക്കായി ഹാര്‍ദിക് പാണ്ഡ്യ, മായങ്ക് മാര്‍ക്കണ്ഡെ എന്നിവര്‍ മൂന്നു വിക്കറ്റ് വീതം നേടി. നേരത്തെ, ടോസ് നഷ്ടപ്പെട്ടു ബാറ്റിംഗിനിറങ്ങിയ മുംബൈ നിശ്ചിത ഓവറില്‍ നാലു വിക്കറ്റ് നഷ്ടത്തില്‍ 165 റണ്‍സ് നേടി. സൂര്യകുമാര്‍ യാദവ്, കൃണാല്‍ പാണ്ഡ്യ, ഇഷാന്‍ കിഷന്‍ എന്നിവരുടെ മികച്ച പ്രകടനങ്ങളാണ് മുംബൈക്കു ഭേദപ്പെട്ട സ്‌കോര്‍ സമ്മാനിച്ചത്
0 comments:
Post a Comment